قصيدة ((نذر)) للشاعر الكبير عريان السيد خلف

نذر

ليس عندي غير روحي
وكانت....وتبقى نذرآ

ادك روحي...نذر
للجايب ابشاره
واورجه .. اعله الجروح المالهن جاره
جرح ينزف..
جرح باني..
اعله بسماره
خجل..
والمايخاف اللوم..
يرضه بذلته وعاره
يالمبشر..
متى المكصوص جنحه..
يطولن كصاره...؟
ومتى الوكت التراده.. ايبدل اطواره..؟
ومتى العايش غريب.. ايآمن بداره..؟
يالمبشر..
ممحله الروح..
غيمك..
عزت امطاره
اوجثيره المايهزها الضيم...
جن كلوبها حجاره
ولو...
لذة عشيج الموت..
كلبه..
يموت بسراره
لجن..شانت على المذبوح..
دمه...
ايضيع فجاره
دفك عينك زمانك ليل..
ليل ..
ايريدله انطاره
ولاكلشي الجليته..ايطيح زنجاره
ولاكلمن يموت... يضيع تذكاره..
هلبت....
مات جيفارا....؟
اوهلبت...
((هوشي منه))..
انكطعت اخباره..؟
عمت عين الوجاغ الماتشب ناره
ولو دنياك غداره
ولو...جرحك
تغفه الاخ باكتاره
لجن..
جرف تعبان...بيه العتب شاره
امن اشوفن...دانك السفان...
صار الروج ...
حداره
يالمبشر.. خيال الليل..
وترد..
كاصره اشباره
اعله هونك...
بيه الك حسبات....
كلها غيوم مطاره
ابدمع ..يا دمعة المهظوم...
ما تعتاز ....تسياره
يناري..
الماجوت ناره..
يعاري...
المالجم عاره
اعله هونك...
من يهاب السيل..
لو ينخاض تياره
اعله هونك...
من تربه هلال..
غطت غيمته انواره
دذر..جرح الصبر..
بارود...
خل يتباهن اكتاره
بيارغ...من تضيف الموت..
خطاره.. يخشى الموت
انه لجرحك..
عشت مجروح....
وانته...
ابعشر معشاره
آلم بيه الوجع نيشان..
ثاير..
مايرد ثاره
واهزك هزة المطعون...
من تتلايم اكتاره
اعله وكتك...
والوكت مشوار...
غمه الباع مشواره
واداري العيب تتداره
اداري العين...
انت العين....
والدم...
ورفيف الدم
اداري الآه.... انته الآه..
وانخه الروح لاتهتم
اداري الحيف..
كل الحيف..
ظل بيك الحلم يحلم
اداري وكضت روحي انذور...
لاود..
لا شمل يلتم
يهاوي الروح..غم الروح ..
كون ابشان
ما تحلم
يباجي العين...ذل العين..
بالدمعات تتوشم
هظم..
والشال هظم الناس لوجه الموت..
ما يندم
لون....
شحت دموع الغيض..
خل دمع العتب..
يلتم
ندامه اعله الشرف...
ينداس
والداس الشرف... يسلم؟؟؟
ندامه اوعزة المندوم...
وكت الثار..
يتحزم
فشك...
والمافهم معناك....
بزمور التفك.. يفهم
اوجرعنه...
اشجم شكل علكم..!!؟
وانت طيف المحبه...وشوك الولايه
انت...
زخات غيمه....
بكاع صبخايه
يشاتل بالكلب دايات...
دايه... تلوب من دايه
يبو الشط النعيش اوياك..
قصة...
طينته... اومايه
اشتكل لمشذبات الروس...
لو جن ليك...
شجايه...؟
اشتكل للطاح...
بين ارماح...
كلها وياه كصايه..؟
اشتكلي..؟
اوبيك روحي تموت..
وترد...
بيك تتحايه
ابرجاها..
ولو كسرها ايجيد..
تصرخ:
وين جباره؟
اوثكلها...
اوعادة المضهود..
بالمعبار.. يتباره
ولو.. جرحك جرف تعبان..
تغفه الآخ..
باكتاره
لجن...؟
شانت على المذبوح..
دمه يضيع فجاره

عريان السيد خلف